பிரமந்தனாற்றுப் படுகொலையின் 41ஆம் ஆண்டு நினைவுதினம் இன்று அனுஷ்டிக்கப்படுகிறது.
1985 ஆம் ஆண்டு ஒக்டோபர் இரண்டாம் திகதி அதிகாலை இடம்பெற்ற இராணுவ நடவடிக்கையின் போது உயிரிழந்த பொதுமக்களை நினைவுகூரும் நாளாக இன்றைய தினம் அனுஷ்டிக்கப்படுகிறது.
1985 ஒக்டோபர் இரண்டாம் திகதி பொழுது புலராத அதிகாலை வேளையில் பிரமந்தனாற்றுக் கிராமத்தின் வான்பரப்பில் உலங்குவானூர்தி ஒன்று வட்டமிட்டவாறு துப்பாக்கிச் சூடு நடத்தியதாகவும் அதனைத் தொடர்ந்து மூன்று சிறிய ரக விமானங்கள் வானில் வட்டமிட்டதாகவும் சம்பவத்தை நினைவுகூரும் சாட்சியங்கள் தெரிவிக்கின்றன.
இராணுவ அணிகள்
இதனைத் தொடர்ந்து கிராமத்தின் தெற்கு எல்லையை அண்மித்த காட்டுப்பகுதியில் உலங்குவானூர்தி மூலம் இராணுவ அணிகள் தரையிறக்கப்பட்டதாகவும் பின்னர் அவர்கள் கிராமத்தைச் சுற்றிவளைத்து முன்னேறியதாகவும் அக்காலச் சம்பவங்களைப் பதிவு செய்தவர்கள் தெரிவிக்கின்றனர்.
வீடுகளை விட்டு வெளியே வந்த மக்களுக்கு அப்பகுதியைச் சேர்ந்த மயிலர் கந்தசாமி உள்ளிட்டோர் இராணுவத்தினர் கிராமத்தை நோக்கி முன்னேறி வருவதாக எச்சரித்ததாகவும் சாட்சியங்கள் பதிவு செய்கின்றன.]
அதனைத் தொடர்ந்து இடம்பெற்ற வன்முறைச் சம்பவங்களில் பொதுமக்கள் உயிரிழந்ததாகக் கூறப்படும் பிரமந்தனாற்றுச் சம்பவம், நாற்பது ஆண்டுகளைக் கடந்த பின்னரும் அப்பகுதி மக்களின் நினைவில் நீங்காத துயரமாகத் தொடர்கிறது.
உயிரிழந்த பொதுமக்களை நினைவுகூர்ந்து அவர்களின் ஆத்மசாந்திக்காக இன்று பிரமந்தனாற்றிலும் புலம்பெயர் வாழ் மக்களிடையிலும் நினைவேந்தல்கள் இடம்பெறுகின்றமை குறிப்பிடத்தக்கது.