அரசியல் நோக்கங்களை வன்முறைகளின் ஊடாக திணிக்க முடியாது என பிரான்ஸ் பிரதமர் செபாஸ்டியன் லெகோர்னு தெரிவித்துள்ளார்.
பிரான்ஸ் முழுவதும் இன்று நடைபெற்ற சில போராட்டங்களின் போது அரங்கேறிய வன்முறைகளை அவர் வன்மையாகக் கண்டித்துள்ளார்.
நமது நாட்டில் அமைதியான போராட்டங்களுக்கு உரிய இடமுண்டு. ஆனால், தீ வைப்பு, கொள்ளை மற்றும் தாக்குதல்களுக்கு இடமில்லை என்று குறிப்பிட்டுள்ளார். தீவிர இடதுசாரி குழுக்களே பல பிரெஞ்சு நகரங்களில் வன்முறையைத் தூண்டுவதாகக் குற்றம் சாட்டியுள்ளார்.
“நமது சட்ட அமலாக்கத் துறையினர் மீது சிலர் களங்கம் கற்பிக்க முனையும் இத்தகைய காலகட்டத்தில், பிரெஞ்சு மக்கள் தங்கள் காவல்துறை மற்றும் பாதுகாப்புப் படையினரைக் குறித்து பெருமிதம் கொள்ள வேண்டும் என குறிப்பிட்டுள்ளார்.
நமது சக குடிமக்களைப் பாதுகாப்பதற்காக அவர்கள் உச்சக்கட்ட தீவிரமான வன்முறைகளை எதிர்கொண்டுள்ளனர்,
எனவே அவர்கள் நமது முழுமையான ஆதரவுக்குரியவர்கள்,” என்றும் அவர் குறிப்பிட்டுள்ளார். பிரான்சின் தீவிர இடதுசாரி கட்சியின் தலைவர் ஜீன்-லூக் மெலஞ்சன் காவல்துறை போராட்டங்களைக் கட்டுப்படுத்திய பகுதிகளைத் தவிர மற்ற இடங்களில் போராட்டங்கள் அமைதியாகவே நடைபெற்று வருவதாகத் தெரிவித்திருந்ததைத் தொடர்ந்து பிரான்ஸ் பிரதமரின் இந்தக் கருத்து வெளியாகியுள்ளது.
“இந்த வன்முறையானது எதிர்வரும் ஜனாதிபதித் தேர்தலுக்கு முந்தைய ஒரு ‘ஒத்திகையாக’ செயல்பட வேண்டும் என்று வெளிப்படையாகத் திட்டமிடுபவர்களுக்கு நான் தெளிவாகக் கூறுகிறேன்.
நாங்கள் அச்சுறுத்தல்களுக்குப் பயந்து பின்வாங்க மாட்டோம். வன்முறை மூலம் எவரும் தங்கள் அரசியல் நிகழ்ச்சி நிரலை திணிக்க முடியாது,” என லெகோர்னு தெரிவித்துள்ளார்.
மேலும், கலவரக்காரர்கள் தாங்களே இழைத்த அல்லது தங்களது சக கலவரக்காரர்களால் விளைவிக்கப்பட்ட சேதங்களுக்கு நிதி ரீதியாகப் பொறுப்பேற்க வழிவகை செய்யும் புதிய மசோதா ஒன்று இந்த மாத இறுதியில் பிரெஞ்சு செனட் சபையில் தாக்கல் செய்யப்பட உள்ளதை அவர் சுட்டிக்காட்டினார்.