இலங்கையில் பிறந்த அரசியல்வாதியான கம்சி குணரத்னம் (Kamzy Gunaratnam), நார்வேயின் புதிய போக்குவரத்து அமைச்சராக நியமிக்கப்பட்டுள்ளமை ஈழ தமிழர்களுக்கு உலகில் பெருமையை தேடி கொடுத்துள்ளது.
யாழ்ப்பாணத்திலிருந்து நார்வே அமைச்சரவை வரை நீண்ட அவரது அரசியல் பயணத்தில் இது மற்றொரு முக்கிய மைல்கல்லாகும். ஜோன்-இவார் நைகார்டுக்கு (Jon-Ivar Nygård) பதிலாக, செப்டம்பர் 11 அன்று நார்வே அரசாங்கம் குணரத்னத்தை அதிகாரப்பூர்வமாக இந்தப் பதவியில் நியமித்தது.
போக்குவரத்து அமைச்சராக, மக்கள் மற்றும் சரக்கு போக்குவரத்து மற்றும் அஞ்சல் சேவைகள் தொடர்பான கொள்கைகளுக்கு அவர் பொறுப்பாவார்.
கம்சி குணரத்னம் கடந்து வந்த பாதை
1988-ல் இலங்கையில் ‘கம்ஷஜினி குணரத்னம்’ (Khamshajiny Gunaratnam) என்ற பெயரில் பிறந்த இவர், சிறு வயதிலேயே தனது குடும்பத்துடன் நார்வேக்குக் குடிபெயர்ந்தார். பின்னர் தொழிலாளர் கட்சியின் (Labour Party) ஊடாக நார்வே அரசியலில் தீவிரமாக ஈடுபட்டார்.
19 வயதில், 2007-ஆம் ஆண்டில் ஒஸ்லோ நகர சபைக்குள் நுழைந்த குணரத்னம், 2015 முதல் 2021 வரை ஒஸ்லோவின் துணை மேயராகப் பணியாற்றினார். 2021-ல் நார்வே நாடாளுமன்றமான ‘ஸ்டோர்டிங்’ (Storting)-க்குத் தேர்ந்தெடுக்கப்பட்ட இவர், 2025-2029 காலப்பகுதிக்கும் மீண்டும் தேர்ந்தெடுக்கப்பட்டுள்ளார்.
தொழிலாளர் கட்சியின் இளைஞர் முகாம் ஒன்றின் மீது துப்பாக்கிதாரி ஒருவர் நடத்திய தாக்குதலான, 2011-ஆம் ஆண்டு நடந்த ‘உட்டோயா’ (Utøya) படுகொலைச் சம்பவத்தில் உயிர் பிழைத்தவர்களில் இவரும் ஒருவர்.
நார்வேயில் தனது அரசியல் பயணத்தின்போதும், இலங்கையில் நடைபெறும் நிகழ்வுகள் குறித்து குணரத்னம் தொடர்ந்து ஆர்வம் காட்டி வந்துள்ளார்.
1988-ல் போரினால் பாதிக்கப்பட்ட இலங்கையில் பிறந்ததை நினைவுகூர்ந்த அவர், பிப்ரவரி 2026-ல் நார்வே நாடாளுமன்றத்தில் நடைபெற்ற விவாதத்தின்போது இலங்கையின் மனித உரிமைகள் நிலைமை குறித்துக் கருத்துத் தெரிவித்தார்.
மேலும், யாழ்ப்பாணத்தின் செம்மணிப் பகுதியில் மனித எச்சங்கள் கண்டெடுக்கப்பட்டது குறித்தும் அவர் குறிப்பாகக் குறிப்பிட்டதுடன், மோதலின் போது காணாமல் போனவர்கள் தொடர்பான தீர்க்கப்படாத கேள்விகள் குறித்தும் தனது கவலையை வெளிப்படுத்தினார்