ஹோர்முஸ் நீரிணை மீதான தனது முற்றுகையை முடித்துக்கொண்டு, ஈரானுடன் பேச்சுவார்த்தையை மீண்டும் தொடங்குமாறு சவூதி அரேபியா அமெரிக்காவை வலியுறுத்தி வருவதாக சர்வதேச ஊடகங்கள் செய்தி வெளியிட்டுள்ளன.
குறித்த விடயத்தை அரபு அதிகாரிகள் வால் ஸ்ட்ரீட் ஜர்னலிடம் தெரிவித்ததாக சர்வதேச ஊடகம் செய்தி வெளியிட்டுள்ளது.
இந்த நிலைமை, செங்கடல் கப்பல் போக்குவரத்து வழித்தடங்கள் மற்றும் சவூதி எண்ணெய் ஏற்றுமதிக்கு அச்சுறுத்தல்கள் போன்ற ஒரு பரந்த பிராந்திய பதற்ற அதிகரிப்பைத் தூண்டக்கூடும் என்று ரியாத் அஞ்சுவதாக அந்த அறிக்கை குறிப்பிடப்பட்டுள்ளது.
கடல் போக்குவரத்து முடங்கும்
சவுதி அரேபிய வட்டாரங்கள் கூறியதாவது: பெர்சிய வளைகுடா மற்றும் செங்கடலுக்கு நடுவே சவுதி அரேபியா அமைந்துள்ளது. தற்போது பெர்சிய வளைகுடாவின் ஹார்முஸ் நீரிணை மூடப்பட்டிருப்பதால் செங்கடல் வழியாக சரக்கு, எண்ணெய் கப்பல் போக்குவரத்தை சவுதி அரேபியா மேற்கொண்டு வருகிறது.
தற்போதைய சூழலில் ஈரானின் தூண்டுதலால் ஹவுத்தி கிளர்ச்சிப் படை செங்கடலில் அமைந்துள்ள பாப் அல் மண்டேப் நீரிணையை மூடும் அபாயம் உள்ளது.
அவ்வாறு மூடப்பட்டால் சவுதி அரேபியாவின் கடல் வழி போக்குவரத்து முழுமையாக முடங்கும். உலகம் முழுவதும் கச்சா எண்ணெய்க்கு பற்றாக்குறை ஏற்படும்.
மேலும் உரங்களுக்கு தட்டுப்பாடு ஏற்பட்டு உணவு தானிய உற்பத்தி பாதிக்கப்படும். வளைகுடா நாடுகளின் ஏற்றுமதி, இறக்குமதி மிகவும் மோசமடையும். எனவே ஹார்முஸ் நீரிணை முடக்கத்தை அமெரிக்கா கைவிட வேண்டும்.
உலகப் பொருளாதார வீழ்ச்சி
இதேவேளை மத்திய கிழக்கில் நீடித்து வரும் போர் பதற்றங்கள் காரணமாக உலகளவில் உணவுப் பாதுகாப்பு பாரிய அச்சுறுத்தலுக்கு உள்ளாகக்கூடும் என உலக வங்கியின் தலைமைப் பொருளாதார நிபுணர் இந்தர்மித் கில் (Indermit Gill) எச்சரித்துள்ளார்.
உலகளாவிய பணவீக்கம் 3 சதவீதத்திலிருந்து 4.7 சதவீதம் வரை உயரக்கூடும். அதேவேளை உலகப் பொருளாதார வளர்ச்சி 40 சதவீதத்தால் வீழ்ச்சியடையும் அபாயம் காணப்படுகிறது என்றும் அவர் குறிப்பிட்டுள்ளார்.
இந்த மோதல் நிலைமை எதிர்வரும் ஓகஸ்ட் மாதம் வரை நீடிக்குமானால், ஏழை நாடுகளில் பட்டினிச் சாவு பாரிய அளவில் ஏற்படக்கூடும் என்றும், தற்போதைய சூழலில் ஒவ்வொரு நாளும் இந்த அபாயகரமான நிலையை நோக்கியே உலகம் நகர்ந்து கொண்டிருப்பதாகவும் இந்தர்மித் கில் தெரிவித்துள்ளார்.